Tubig mula Angat Dam na laan sa Maynilad, Manila Water posibleng taasan

Posibleng taasan na ang alokasyon ng tubig ng Maynilad at Manila Water galing Angat Dam dahil sa patuloy na pagtaas ng antas ng tubig sa imbakan, ayon sa tagapamuno ng National Water Resources Board (NWRB).

Posibleng itaas sa 38 hanggang 40 cubic meters per second ang alokasyon ng tubig para sa mga water concessionaire, ani NWRB Executive Director Sevillo David.

Pero hindi pa raw ito puwedeng ibalik sa normal na alokasyong 46 cubic meters per second.

Sa ngayon, 99 porsiyento nang naibalik sa normal ang suplay ng tubig sa Manila Water customers at 94 porsiyento naman sa Maynilad bunsod ng patuloy na pagtaas ng antas ng tubig sa Angat Dam.

Suportado rin ng bagong administrador ng Metropolitan Waterworks and Sewerage System (MWSS) ang diskarteng tipirin muna ang tubig sa Angat Dam.

Ayon kay MWSS Administrator Emmanuel Salamat, isa raw sa mga utos sa kaniya ni Pangulong Rodrigo Duterte ay tiyaking hindi na mauulit sa susunod na taon ang krisis sa tubig.

May mga programa na raw si Salamat para maging sapat ang suplay ng tubig sa susunod na tag-init.

“We will strategize measures to prevent such occurrences,” ani Salamat.

Inumpisahan na rin ni Salamat ang pagrepaso sa concession agreement o kasunduan ng gobyerno sa Maynilad at Manila Water.

Target din ni Salamat na madagdagan ang pinagkukuhanan ng tubig para hindi lang sa Angat Dam umaasa ang mga taga-Metro Manila.

— Ulat ni Alvin Elchico, ABS-CBN News

Bisitahin ang Patrol.PH para sa iba pang mga balita.

Be the first to comment

Leave a Reply

Your email address will not be published.


*


This site is protected by reCAPTCHA and the Google Privacy Policy and Terms of Service apply.

This site uses Akismet to reduce spam. Learn how your comment data is processed.